Síld, síld og aftur síld...

Hún hefur verið köllur silfur hafsins og gull Íslands, enda gjörbreytti hún flestu sem hægt var að breyta.  Á fræðslukvöldi Íslenska vitafélagsins - félags um íslenska strandmenningu sem bera yfirskriftina Spegill fortíðar – silfur framtíðar, mun Steinar J. Lúðvíksson, rithöfundur fjalla um síldina - út frá því sjónarhorni hvaða þjóðfélagslega þýðingu síldveiðarnar höfðu á Íslandi frá því að þær hófust á seinni hlutu 19. aldar og fram yfir þann tíma sem hrunið mikla varð á árunum 1967 - 1968. Hvaða áhrif síldveiðarnar höfðu á búsetu í landinu og urðu m.a. til þess að vistabandð hélt ekki lengur. Hvernig síldveiðarnar gjörbreyttu öllu viðskiptaumhverfi almennings þar sem farið var að greiða verkalaun í peningum. Hvaða áhrif miklar sveiflur í síldveiðunum frá ári til árs höfðu á afkomu almennings. Fjalla um búferlaflutninga til og frá "síldarstöðunum", hvaða áhrif síldveiðarnar og síldarvinnslan hafði á verkalýðsbaráttuna á Íslandi og kannski síðast en ekki síst þau áhrif sem síldveiðarnar höfðu á tæknikunnáttu Íslendinga, t.d. veiðarfæragerð og notkun nýs veiðibúnaðar.  Og Dr. Sigrún Klara Hannesdóttir segir frá því hvaða áhrif síldarvinnslan á sjötta og sjöunda áratugi síðustu aldar hafði á síldarstelpurnar á Austfjörðum?  Talsvert hefur verið skrifað um síldina og áhrif síldarinnar á samfélög og efnahag þeirra þorpa og bæja sem mest tóku á móti síldinni. Síldarstúlkan brosir á forsíðu bóka enda myndrænt tákn um allan hamaganginn. En hvernig var að vera síldarstelpa á þessum árum? Í þessum fyrirlestri er sagt frá þremur árum við söltun og tveimur árum í mjölverksmiðju á Seyðisfirð á árunum 1958-1962. 

Staður og stund: Víkin-sjóminjasafn, Grandagarði, Reykjavík.                                      Miðvikudaginn 11. janúar klukkan 20:00.

Óskum öllum félagsmönnum og velunnurum  íslenskrar strandmenningar gleði og friðar á jólum og hlökkum til samstarfsins á komandi ári.

Sjáumst í sjóminjasafninu Víkinni 11. janúar 2012

Spegill fortíðar - silfur framtíðar á miðvikudaginn í Sjóminjsafninu Víkinni, Grandagarði.

Guðbjörg Helga Jóhannesdóttir, atvinnu- og hlunnindaráðgjafi Bændasamtaka Íslands, ræðir um íslenskan æðardún og náttúruleg verðmæti hans. Hún fer yfir sögu æðarræktar á Íslandi og segir frá einstöku og fallegu vinasambandi sem hefur þróast milli æðarbænda og þessa villta fugls. Guðbjörg fjallar um eiginleika æðardúns og verkun hans og framleiðsluferli allt frá dúntekju úr hreiðri þar til hann er kominn í hendur endanlegra kaupenda í sæng eða annarri dúnvöru.
Markaðshlutdeild íslensks æðardúns er um 80-90% á heimsmarkaði æðardúns og því ljóst að um mjög sjaldgæfa og verðmæta afurð er að ræða. Guðbjörg mun ennfremur segja frá þeirri vinnu sem er hafin við að styrkja fullframleiðslu vara hér heima og ræða ýmis atvinnutækifæri tengd ferðaþjónustu og æðarfugli.

Staður og stund: Sjóminjasafnið Víkin, Grandagarði.
Miðvikudagskvöldið 2.nóvember kl. 20:00